واشنگٹن: واشنگٹن میں چینی سفارتخانے نے امریکہ میں اپنے شہریوں، خاص کر طلبہ، کو ورچوئل اغوا اور اس نوعیت کے جھانسوں کے حوالے سے خبردار رہنے کیلئے انتباہ جاری کر دیا۔
غیر ملکی میڈیا کے مطابق حال ہی میں امریکہ میں مقیم 17 سالہ لاپتہ چینی طالبعلم کائی سوانگ 31 دسمبر کو بازیاب کرایا گیا۔ کائی کے والدین نے حکام کو بتایا کہ ان سے تاوان کا مطالبہ کیا گیا تھا اور اس دوران ان کے بیٹے کی تصاویر بھیج کر ان کے اغوا کا عندیہ دیا گیا تھا۔
مقامی پولیس نے بتایا کہ کائی کے والدین نے جھانسے میں آ کر چین میں موجود ایک بینک اکاؤنٹ میں قریب 80 ہزار امریکی ڈالر کی ادائیگی کی ہے۔
پولیس کے مطابق ان کیسز میں متاثرہ شخص اور اس کے خاندان دونوں کو یقین دلایا جاتا ہے کہ دوسرا فریق اغوا ہوگیا ہے اور اگر انہوں نے بات نہ مانی تو ان کے پیارے کو نقصان پہنچ سکتا ہے۔ پولیس کا کہنا ہے کہ سائبر اغوا کار متاثرین کو ورچوئلی اس مقام پر لے جاتے ہیں کہ ان سے ایسی تصاویر کھنچوا لیتے ہیں جس سے یہ ظاہر ہو کہ وہ واقعی طور پر اغوا ہو چکے ہیں جبکہ حقیقت میں وہ بندہ ان کے پاس نہیں ہوتا اور اس دوران متاثرہ افراد کی نگرانی فیس ٹائم یا سکائپ کے ذریعے کی جاتی ہے۔ اس کے نتیجے میں سائبر اغواکاری کے متاثرین گھبراہٹ کے مارے گوری طورپر تاوان دینے کو تیار ہو جاتے ہیں۔
