Sargaram | Newspaper

منگل 21 مئی 2024

ای-پیپر | E-paper

عالمی برادری فلسطینیوں کیخلاف ظلم وجبر روکنے کیلئے اسرائیل پر دباؤ ڈالے: وزیراعظم

Share

اسلام آباد: وزیر اعظم شہاز شریف نے عالمی یوم القدس اور جمعتہ الوداع کے موقع پر  جاری پیغام میں کہا ہےکہ عالمی برادری فلسطینیوں کے خلاف ظلم وجبر روکنے کیلئے اسرائیل پر دباؤ ڈالے۔

وزیراعظم شہباز شریف نے عالمی یوم القدس اور جمعتہ الوداع کے موقع جاری پیغام میں کہا کہ پوری پاکستانی قوم آج صہیونی جارحیت اور ظلم و جبر کی مذمت کرتی ہے اور اپنے نہتے فلسطینی بہن بھائیوں کے ساتھ اظہارِ یکجہتی کرتے ہیں۔

وزیرِ اعظم نے کہا کہ 7 دہائیوں سے اسرائیل فلسطین اور بیت المقدس پر ناجائز اور غیر قانونی طور پر قابض ہے، عالمی برادری خاموش تماشائی کا کردار ادا کررہی ہے، غزہ میں اسپتالوں اور پناہ گزین کیمپوں اور بچوں کے اسکولوں کو دانستہ طور پر نشانہ بنایا گیا اور مظلوم فلسطینیوں تک امدادی اشیاء کی رسائی کو بھی روکا گیا۔

شہباز شریف کا کہنا تھا کہ عالمی برادری فلسطینیوں کےخلاف ظلم وجبر روکنے کیلئے اسرائیل پر دباؤ ڈالے، پاکستان ایک آزاد فلسطینی ریاست کے قیام، فلسطینی بہن بھائیوں کی اخلاقی اور سفارتی حمایت جاری رکھے گا، عوام جمعتہ الوداع پر فلسطینی اور کشمیری بہن بھائیوں کو دعاؤں میں یاد رکھیں۔

کراچی میں آج  یوم القدس ریلی کا انعقاد

دوسری جانب کراچی میں بعد نماز جمعہ نمائش سے تبت سینٹر تک یوم القدس ریلی نکالی جائے گی۔

ٹریفک پولیس کی جانب سے ہدایت کی گئی ہے کہ عوام ایم اے جناح روڈ کے بجائے متبادل روٹ کا انتخاب کریں، تین ہٹی سے آنے والے ٹریفک کو گرومندر سے سولجر بازار کی طرف موڑ دیا جائے گا جب کہ لکی اسٹار سے آنے والے ٹریفک کوپی پی چورنگی کی جانب موڑ دیا جائے گا۔

Share this Article
- اشتہارات -
Ad imageAd image