اسلام آباد :(روزنامہ سرگرم) پاکستان ایران گیس پائپ لائن پراجیکٹ کے حوالے سے ایک اہم پیش رفت سامنے آئی ہے، دونوں ممالک اتفاق رائے پیدا کرنے پر رضامند ہوگئے۔
تفصیلات کے مطابق چیئرمین اسٹینڈنگ کمیٹی برائے پٹرولیم محمد عبدالقادر نے کہا ہے کہ ایک بہت بڑی پیشرفت میں ایران پاکستان گیس پائپ لائن پراجیکٹ پر دونوں ممالک کے درمیان ستمبر 2024تک فعال رابطے بڑھانے پر اتفاق ہوگیا ہے۔
محمد عبدالقادر نے کہا کہ دونوں ممالک 2سے 3ہفتوں میں ایک دوسرے سے باقاعدہ رابطے شروع کردیں گے، دونوں ممالک پراجیکٹ اس انداز سے پورا کرنا چاہتے ہیں کہ اس پر امریکی پابندیوں کا اثر نہ پڑے۔
انہوں نے کہا کہ پاکستان گیس کی قلت کا سامنا کر رہا ہے تاہم اپنی ضروریات پوری کرنے کے لیے مہنگی ایل این جی درآمد کر رہا ہے۔
یاد رہے کہ اس سے قبل مذاکرات کے دوران ایران کا مؤقف تھا کہ گیس کی تجارت پر امریکی پابندیوں کا اثر نہیں پڑتا۔
