بیلٹ اینڈ روڈ منصوبے کی 10 سالہ تقریبات، چین نے پاکستانی وزیراعظم کو شرکت کی دعوت دیدی

اسلام آباد ( روزنامہ سر گرم ) چین نے بیلٹ اینڈ روڈ منصوبے کی 10 سالہ تقریبات میں شرکت کیلئے نگران وزیراعظم کو دعوت دے دی۔ میڈیا رپورٹس کے مطابق چین کی جانب سے بیلٹ اینڈ روڈ انٹرنیشنل فورم کی تیسری کانفرنس میں بین الاقوامی سربراہان کو شرکت کی دعوت دی گئی ہے، بیلٹ اینڈ روڈ انٹرنیشنل فورم کانفرنس کا انعقاد اکتوبر کے وسط میں منعقد کیے جانے کا امکان ہے، جس میں شرکت کے لیے پاکستانی وزیراعظم کو بھی دعوی دی گئی ہے

3 روزہ تقریبات میں شرکت کیلئے نگران وزیر اعظم انوار الحق کاکڑ آئندہ ماہ چین روانہ ہوں گے۔ ذرائع کے حوالے سے معلوم ہوا ہے کہ دورے کے دوران سی پیک اور دیگر منصوبوں سے متعلق بھی امور کا جائزہ لیا جائے گا، اس موقع پر نگران وزیراعظم انوار الحق کاکڑ کی چین کی بزنس کمیونٹی سے بھی ملاقات ہوگی جس میں وہ انہیں پاکستان میں سرمایہ کاری کی دعوت اور ایس آئی ایف سی کے قیام پر آگاہی دیں گے، وزیر اعظم کے ہمراہ وفاقی وزراء اور وفد بھی تقریبات میں شرکت کرے گا۔

خیال رہے کہ نگراں وزیرِ اعظم انوار الحق کاکڑ ان دنوں اپنے 5 روزہ دورہ امریکہ پر موجود ہیں، جہاں وہ نیویارک میں اقوامِ متحدہ کی جنرل اسمبلی کے 78ویں اجلاس سے خطاب کریں گے، نگراں وزیرِ اعظم نیویارک میں جنرل اسمبلی اجلاس میں شرکت کے ساتھ ساتھ عالمی رہنماؤں سے ملاقاتیں بھی کریں گے، نگراں وزیر اعظم امریکہ میں اقوام متحدہ جنرل اسمبلی اجلاس کے علاوہ موسمیاتی تبدیلی پر منعقد ہونے والی اہم کانفرنس میں بھی شرکت کریں گے، انوار الحق کاکڑ اس دورے میں بین الاقوامی ذرائع ابلاغ کے نمائندوں سے ملاقات کریں گے اور امریکہ کے معروف تھنک ٹینکس کا دورہ کریں گے، نگران وزیر خارجہ جلیل عباس جیلانی بھی وزیراعظم کے ہمراہ ہیں۔

حکام دفترخارجہ کی جانب سے بتایا گیا ہے کہ 19 ستمبر کو ایس ڈی جی سمٹ اور مختلف ڈائیلاگ کا انعقاد ہوگا، وزیر اعظم کی 20 ستمبر کو کلائمٹ ایمیشن سمٹ میں بھی شرکت کا امکان ہے جبکہ 20 ستمبر کو ہی پینڈیمک پریوینشن پراجلاس میں بھی وہ شرکت کریں گے۔ حکام دفترخارجہ کے مطابق انوارالحق کاکڑ 20 ستمبرکو ایک مالی کانفرنس میں بھی جی 77 اور مالی وسائل پر بات کریں گے اور وہ 22 ستمبر کو اقوام متحدہ جنرل اسمبلی کے مرکزی اجلاس میں خطاب کریں گے۔