لاہور: آئی جی پنجاب نے پنجاب پولیس کو پتنگ کی ڈور کی تیاری اور فروخت کرنیوالوں کے خلاف کریک ڈاؤن کرنے کا حکم دیدیا۔
تفصیلات کے مطابق پنجاب میں پتنگ سے متعدد لوگوں کے جاں بحق ہونے کے بعد تشویش کی لہر دوڑ گئی ہے، اسی معاملے سے متعلق آئی جی پنجاب ڈاکٹر عثمان انور کی زیر صدارت اجلاس ہوا۔
اجلاس میں لاہور کے آر پی اوز، سی پی اوز، ڈی پی اوز نے ویڈیو لنک کے ذریعے شرکت کی، اجلاس میں آئی جی پنجاب ڈاکٹر عثمان انور نے پنجاب پولیس کو پتنگ کی ڈور بنانے اور فروخت کرنیوالوں کے خلاف کریک ڈاؤن کا حکم دیا ہے۔
آئی جی پنجاب نے کہا کہ موٹر سائیکل سواروں کیلئے حفاظتی انٹینا لگانے کی مہم تیز کی جائے، اس کے علاوہ منشیات کی سپلائی چین توڑنے کیلئے اقدامات کیےجائیں۔
اجلاس میں آئی جی پنجاب نے چینی سمیت تمام غیر ملکی شہریوں کی سیکیورٹی مزید سخت کرنے کی ہدایت کی ہے۔
