لاہور : وزیراعلیٰ پنجاب مریم نواز نے پنجاب بھر کے قیدیوں کی سزا میں تین ماہ کی معافی کااعلان کردیا اور کہا 155 قیدیوں کو آج رہا کررہے ہیں۔
تفصیلات کے مطابق وزیراعلیٰ پنجاب مریم نواز نے کوٹ لکھپت جیل کے دوران قیدی خواتین سے خطاب کرتے ہوئے کہا کہ کچھ لوگ آج رہا ہو رہے ہیں،کچھ آنےوالےدنوں میں رہا ہوں گے، والد کے ہمراہ جیل میں قید و بند کی صعوبتیں گزاریں، جیل کےقیدیوں کے مسائل کا بخوبی ادراک ہے۔
مریم نواز نے جیل میں گزارے دنوں کا ذکر کرتے ہوئے کہا کہ کہ کوٹ لکھپت اور اڈیالہ جیل میں بھی 4سے5ماہ رہی ہوں، مجھے ایک خط ملاکہ میرے والد کو گرفتار کرکے نیب لیکر جارہے ہیں ، آپ لوگوں میں سے ہی ایک اسٹاف نے بتایا میرے والد کی طبیعت خراب ہوگئی، کوٹ لکھپت میں گزرنے والا وقت آزمائشی تھا۔
وزیراعلیٰ پنجاب نے مزید بتایا کہ قید کےدوران جب ضمانت کی تاریخ آتی تھی تو انتظارہوتاتھاشایدکوئی خبرآئے، میری تاریخ کےوقت جج3ماہ کی چھٹی پرچلاجاتا تھا، آپ میں سےبہت سارےلوگ بےگناہ ہوں گے، ہمارے نظام انصاف میں کمزوری ہوسکتی ہے مگراللہ کےنہیں، مشکل وقت میں بھی آپ کیلئے جوآسانی کر سکی کروں گی۔
ان کا کہنا تھا کہ یہ کافی تو نہیں لیکن جب آپ کو اپنے پیاروں کی یاد آئے توبات چیت کرسکیں، اپنی مرضی سےجیل کوئی نہیں آتاانسان سےکوئی غلطی سرزدہوجاتی ہے، کوشش ہوگی آئی جی جیل خانہ جات سےمیٹنگ کرکےآپ کیلئےاصلاحات کی جائیں، آپ لوگوں کوایک بہترین ہنرسکھایاجائےتاکہ باہرنکل کرآپ ایک اچھےانسان بن جائیں۔
وزیراعلیٰ پنجاب نے اپنے خطاب میں کہا کہ آپ لوگوں کیلئے ویڈیوکال کی سہولت لیکرآئی ہوں، آئی جی جیل خانہ جات سے کہوں گی ویڈیوکال کی سہولت پورےپنجاب کی جیلوں میں ہونی چاہئے، اب آپ اپنے گھر والوں سے ہفتے میں 2بار 20،20منٹ ویڈیو کال پر بات کرسکیں گے۔
مریم نواز نے پنجاب بھر کے قیدیوں کی سزامیں 3ماہ کی معافی کااعلان کرتے ہوئے کہا مجموعی طورپر دیت کی رقم ادا کرنیوالے 155 قیدیوں کو آج رہا کررہےہیں، خوشی ہے رہا ہونیوالے قیدی رمضان کے باقی روزے اپنے گھر والوں کیساتھ رکھ سکیں گے۔
ان کا مزید کہنا تھا کہ ہمارانظام قانون طاقتور کیلئے کمزور بے گناہ کیلئے طاقتور ہے، جوڈیشری سےگزارش کروں گی جوانصاف کے منتظر ہیں جلد فراہم کیا جائے۔
وزیراعلیٰ پنجاب نے بتایا کہ میں نے یہاں 20 بیڈ کے اسپتال کا بھی افتتاح کرکےآئی ہوں، انہیں شاباش دیتی ہوں بڑااچھااسپتال بنایا ہے۔
